2 Samuel 21
1ⲁⲩⲱ ⲁⲩϩⲉⲃⲱⲱⲛ ϣⲱⲡⲉ ϩⲛ ⲛⲉϩⲟⲟⲩ ⲛⲇ︤ⲁ︦ⲇ︥ ⲛϣⲟⲙⲧⲉ ⲛⲣⲟⲙⲡⲉ ⲛⲥⲁ ⲛⲉⲩⲉⲣⲏⲩ ⲁⲩⲱ ⲇ︤ⲁ︦ⲇ︥ ⲁϥⲕⲱⲧⲉ ⲛⲥⲁ ⲡϩⲟ ⲙⲡϫⲟⲉⲓⲥ ⲡⲉϫⲉⲡϫⲟⲉⲓⲥ ϫⲉ ⲉⲣⲉⲧⲁⲇⲓⲕⲓⲁ ϣⲟⲟⲡ ⲉϫⲛ ⲥⲁⲟⲩⲗ ⲁⲩⲱ ⲉϫⲙ ⲡⲉϥⲏⲓ ⲉⲃⲟⲗ ϫⲉ ⲁϥⲙⲟⲩⲟⲩⲧ ⲛⲛⲉⲅⲁⲃⲁⲱⲛⲓⲧⲏⲥ 2ⲁⲩⲱ ⲡⲣⲣⲟ ⲇ︤ⲁ︦ⲇ︥ ⲁϥⲙⲟⲩⲧⲉ ⲛⲅⲁⲃⲁⲱⲛⲓⲧⲏⲥ ⲁϥϣⲁϫⲉ ⲛⲙⲙⲁⲩ ⲛⲅⲁⲃⲁⲱⲛⲓⲧⲏⲥ ⲇⲉ ⲛϣⲏⲣⲉ ⲁⲛ ⲛⲉ ⲙⲡⲓ︤ⲏ︦ⲗ︥ ⲁⲗⲗⲁ ⲡⲥⲉⲉⲡⲉ ⲛⲉ ⲙⲡⲁⲙⲟⲣⲁⲓⲟⲥ ⲁⲩⲱ ⲛϣⲏⲣⲉ ⲙⲡⲓ︤ⲏ︦ⲗ︥ ⲁⲩⲣⲁⲛⲁϣ ⲛⲁⲩ ⲥⲁⲟⲩⲗ ⲇⲉ ⲁϥⲕⲱⲧⲉ ⲛⲥⲁ ⲑⲉ ⲙⲙⲟⲟⲧⲟⲩ ϩⲙ ⲡⲧⲣⲉϥⲕⲱϩ ⲉⲛϣⲏⲣⲉ ⲙⲡⲓ︤ⲏ︦ⲗ︥ ⲙⲛ ⲓⲟⲩⲇⲁ 3ⲡⲉϫⲉⲇ︤ⲁ︦ⲇ︥ ⲇⲉ ⲉⲛⲅⲁⲃⲁⲱⲛⲓⲧⲏⲥ ϫⲉ ⲟⲩ ⲡⲉϯⲛⲁⲁⲁϥ ⲛⲏⲧⲛ ⲁⲩⲱ ⲉⲓⲛⲁⲉϣⲧⲱⲃϩ ϩⲛ ⲟⲩ ⲉⲧⲣⲉⲧⲉⲧⲛⲥⲙⲟⲩ ⲉⲧⲉⲕⲗⲏⲣⲟⲛⲟⲙⲓⲁ ⲙⲡϫⲟⲉⲓⲥ 4ⲛⲅⲁⲃⲁⲱⲛⲓⲧⲏⲥ ⲇⲉ ⲡⲉϫⲁⲩ ⲛⲁϥ ϫⲉ ⲙⲛϩⲁⲧ ⲟⲩⲇⲉ ⲙⲛⲛⲟⲩⲃ ϣⲟⲟⲡ ⲛⲁⲛ ⲙⲛ ⲥⲁⲟⲩⲗ ⲁⲩⲱ ⲙⲛ ⲡⲉϥⲏⲓ ⲁⲩⲱ ⲙⲛⲣⲱⲙⲉ ϩⲙ ⲡⲓ︤ⲏ︦ⲗ︥ ⲉⲟⲩⲛⲧⲁⲛϩⲱⲃ ⲛⲙⲙⲁϥ ⲉⲙⲟⲟⲩⲧϥ ⲡⲉϫⲉⲇ︤ⲁ︦ⲇ︥ ⲛⲁⲩ ϫⲉ ⲛⲧⲱⲧⲛ ⲉⲧⲉⲧⲛϫⲱ ⲙⲙⲟⲥ ϫⲉ ⲟⲩ ⲁⲩⲱ ϯⲛⲁⲁⲁϥ ⲛⲏⲧⲛ 5ⲡⲉϫⲁⲩ ⲉϩⲟⲩⲛ ϩⲙ ⲡⲣⲣⲟ ϫⲉ ⲡⲣⲱⲙⲉ ⲛⲧⲁϥϫⲱⲕ ⲉⲃⲟⲗ ⲉϩⲣⲁⲓ ⲉϫⲱⲛ ⲛⲟⲩⲕⲁⲕⲓⲁ ⲁⲩⲱ ⲁϥⲇⲓⲱⲕⲉⲓ ⲙⲙⲟⲛ ⲁⲩⲱ ⲁϥⲣⲕⲣⲟϥ ⲉⲃⲟⲧⲛ ⲉⲃⲟⲗ ϩⲛ ⲟⲩⲧⲁⲕⲟ ⲙⲁⲣⲉⲛⲧⲁⲕⲟϥ ⲉⲧⲙⲧⲣⲉϥⲁϩⲉⲣⲁⲧϥ ϩⲛ ⲗⲁⲁⲩ ⲛⲧⲟϣ ⲛⲧⲉ ⲡⲓ︤ⲏ︦ⲗ︥ 6ⲙⲁ ⲛⲁⲛ ⲛⲥⲁϣϥ ⲛⲣⲱⲙⲉ ⲉⲃⲟⲗ ϩⲛ ⲛⲉϥϣⲏⲣⲉ ⲛⲧⲛⲕⲁⲁⲩ ⲉⲩϭⲗϭⲱⲗ ⲉⲃⲟⲗ ϩⲁ ⲡⲣⲏ ⲛⲁϩⲣⲙ ⲡϫⲟⲉⲓⲥ ϩⲛ ⲅⲁⲃⲁⲱⲛ ⲉⲃⲟⲗ ϩⲛ ⲥⲁⲟⲩⲗ ⲡⲥⲱⲧⲡ ϩⲙ ⲡϫⲟⲉⲓⲥ ⲡⲉϫⲉⲇ︤ⲁ︦ⲇ︥ ϫⲉ ⲁⲛⲟⲕ ϯⲛⲁⲧⲁⲁⲩ ⲛⲏⲧⲛ 7ⲁⲩⲱ ⲡⲣⲣⲟ ⲁϥϯⲥⲟ ⲉⲉⲛⲧⲟⲟⲧϥ ⲉϫⲙ ⲙⲉⲙⲫⲓⲃⲟⲥⲑⲉ ⲉⲧⲃⲉ ⲡⲁⲛⲁϣ ⲙⲡϫⲟⲉⲓⲥ ⲉⲧⲟⲩⲧⲱϥ ⲁⲩⲱ ⲉⲧⲟⲩⲧⲱϥ ⲛⲓⲱⲛⲁⲑⲁⲛ ⲡϣⲏⲣⲉ ⲛⲥⲁⲟⲩⲗ 8ⲡⲣⲣⲟ ⲇⲉ ⲁϥϫⲓ ⲙⲡϣⲏⲣⲉ ⲥⲛⲁⲩ ⲛϩⲣⲉⲥⲫⲁ ⲧϣⲉⲉⲣⲉ ⲛⲁⲓⲁ ⲛⲁⲓ ⲛⲧⲁⲩϫⲡⲟⲟⲩ ⲛⲥⲁⲟⲩⲗ ϩⲉⲣⲙⲱⲛⲓ ⲙⲛ ⲙⲉⲙⲫⲓⲃⲟⲥⲑⲉ ⲁⲩⲱ ⲡϯⲟⲩ ⲛϣⲏⲣⲉ ⲙⲙⲉⲗⲭⲱⲗ ⲧϣⲉⲉⲣⲉ ⲛⲥⲁⲟⲩⲗ ⲛⲁⲓ ⲛⲧⲁⲥϫⲡⲟⲟⲩ ⲛⲉⲥⲣⲓⲏⲗ ⲡϣⲏⲣⲉ ⲛⲃⲉⲣⲍⲉⲗⲗⲓ ⲡⲙⲟⲟⲩⲗⲁⲑⲓ 9ⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲛⲅⲁⲃⲁⲱⲛⲓⲧⲏⲥ ⲁⲩϭⲗϭⲱⲗⲟⲩ ϩⲁ ⲡⲣⲏ ϩⲙ ⲡⲧⲟⲟⲩ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲛⲧⲟⲟⲩ ⲙⲡⲥⲁϣϥ ⲁⲩⲣⲱϩⲧ ϩⲓⲟⲩⲥⲟⲡ ⲁⲩⲱ ⲛⲧⲟⲟⲩ ⲁⲩⲙⲟⲟⲩⲧⲟⲩ ϩⲛ ⲛⲉϩⲟⲟⲩ ⲛϣⲟⲣⲡ ⲙⲡⲱϩⲥ ϩⲛ ⲧⲁⲣⲭⲏ ⲙⲡⲉϩⲥⲉⲓⲱⲧ 10ⲁⲩⲱ ϩⲣⲉⲥⲫⲁ ⲧϣⲉⲉⲣⲉ ⲛⲁⲓⲁ ⲁⲥϫⲓ ⲛⲟⲩϭⲟⲟⲩⲛⲉ ⲁⲥⲡⲏⲥⲥⲉ ⲙⲙⲟⲥ ϩⲁⲧⲛ ⲧⲡⲉⲧⲣⲁ ϩⲛ ⲧⲁⲣⲭⲏ ⲙⲡⲉϩⲥⲉⲓⲱⲧ ϣⲁⲛⲧⲉⲟⲩⲙⲟⲟⲩ ⲉⲓ ⲉϫⲱⲥ ⲉⲃⲟⲗ ϩⲛ ⲧⲡⲉ ⲙⲡⲉⲥϯⲑⲉ ⲛⲛⲉϩⲁⲗⲁⲧⲉ ⲛⲧⲡⲉ ⲉⲧⲣⲉⲩⲟⲩⲱϩ ϩⲓϫⲱⲟⲩ ⲙⲡⲉϩⲟⲟⲩ ⲟⲩⲇⲉ ⲛⲉⲑⲏⲣⲓⲟⲛ ⲛⲧⲥⲱϣⲉ ⲉⲧⲣⲉⲩⲉⲓ ⲉϫⲱⲟⲩ ⲛⲧⲉⲩϣⲏ 11ⲁⲩⲧⲁⲙⲉⲇ︤ⲁ︦ⲇ︥ ⲇⲉ ⲉⲛⲉⲛⲧⲁⲥⲁⲁⲩ ⲛϭⲓ ϩⲣⲉⲥⲫⲁ ⲧϣⲉⲉⲣⲉ ⲛⲁⲓⲁ ⲧⲡⲁⲗⲗⲁⲕⲏ ⲛⲥⲁⲟⲩⲗ ⲁⲩⲱ ⲁⲩⲃⲱⲗ ⲉⲃⲟⲗ ⲁⲩⲧⲁϩⲟⲟⲩ ⲇⲉ ⲛϭⲓ ⲇⲁⲛ ⲡϣⲏⲣⲉ ⲛⲓⲱⲁ ⲡⲉ ⲉⲃⲟⲗ ϩⲙ ⲡⲉϫⲡⲟ ⲛⲛⲉⲅⲓⲅⲁⲥ 12ⲁⲩⲱ ⲁϥⲃⲱⲕ ⲛϭⲓ ⲇ︤ⲁ︦ⲇ︥ ⲁϥϫⲓ ⲛⲛⲉⲕⲉⲉⲥ ⲛⲥⲁⲟⲩⲗ ⲁⲩⲱ ⲛⲕⲉⲉⲥ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲛⲧⲟⲟⲧⲟⲩ ⲛⲛⲣⲱⲙⲉ ⲛⲓⲁⲃⲓⲥ ⲛⲧⲉ ⲡⲕⲁϩ ⲛⲅⲁⲗⲁⲁⲇ ⲛⲁⲓ ⲛⲧⲁⲩϩⲟⲃⲧⲟⲩ ⲉⲃⲟⲗ ϩⲛ ⲧⲉⲡⲗⲁⲧⲓⲁ ⲛⲃⲁⲓⲑⲥⲁⲛ ϫⲉ ⲛⲁⲗⲗⲟⲫⲩⲗⲟⲥ ⲁⲩⲕⲁⲁⲩ ϩⲙ ⲡⲙⲁ ⲉⲧⲙⲙⲁⲩ ϩⲙ ⲡⲉϩⲟⲟⲩ ⲛⲧⲁⲛⲁⲗⲗⲟⲫⲩⲗⲟⲥ ⲡⲁⲧⲁⲥⲥⲉ ⲛⲥⲁⲟⲩⲗ ϩⲛ ⲅⲉⲗⲃⲟⲩⲉ 13ⲁⲩⲱ ⲁϥⲉⲓⲛⲉ ⲉϩⲣⲁⲓ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲛⲛⲉⲕⲉⲉⲥ ⲛⲥⲁⲟⲩⲗ ⲁⲩⲱ ⲛⲕⲉⲉⲥ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲁϥⲥⲱⲟⲩϩ ⲟⲛ ⲉϩⲟⲩⲛ ⲛⲛⲉⲕⲉⲉⲥ ⲛⲛⲉⲛⲧⲁⲩϭⲗϭⲱⲗⲟⲩ ⲉⲃⲟⲗ ϩⲁ ⲡⲣⲏ 14ⲁⲩⲱ ⲁϥⲧⲱⲙⲥ ⲛⲛⲉⲕⲉⲉⲥ ⲛⲥⲁⲟⲩⲗ ⲙⲛ ⲛⲉⲕⲉⲉⲥ ⲛⲓⲱⲛⲁⲑⲁⲛ ⲡⲉϥϣⲏⲣⲉ ⲙⲛ ⲛⲉⲕⲉⲉⲥ ⲛⲛⲉⲛⲕⲟⲟⲩⲉ ⲛⲧⲁⲩϭⲗϭⲱⲗⲟⲩ ϩⲁ ⲡⲣⲏ ϩⲙ ⲡⲕⲁϩ ⲛⲃⲉⲛⲓⲁⲙⲓⲛ ⲛⲥⲁⲥⲡⲓⲣ ⲙⲡⲧⲁⲫⲟⲥ ⲛϭⲓⲥ ⲡⲉϥⲉⲓⲱⲧ ⲁⲩⲱ ⲁⲩⲉⲓⲣⲉ ⲛϩⲱⲃ ⲛⲓⲙ ⲛⲧⲁⲡⲣⲣⲟ ϩⲱⲛ ⲙⲙⲟⲟⲩ ⲉⲧⲟⲟⲧⲟⲩ ⲁⲩⲱ ⲡⲛⲟⲩⲧⲉ ⲁϥⲥⲱⲧⲙ ⲁϥϣⲛϩⲧⲏϥ ϩⲁ ⲡⲕⲁϩ 15ⲁⲩⲡⲟⲗⲉⲙⲟⲥ ⲇⲉ ϣⲱⲡⲉ ⲛⲧⲉ ⲛⲁⲗⲗⲟⲫⲩⲗⲟⲥ ⲙⲛ ⲡⲓ︤ⲏ︦ⲗ︥ ⲁⲩⲱ ⲇ︤ⲁ︦ⲇ︥ ⲁϥⲃⲱⲕ ⲉⲃⲟⲗ ⲙⲛ ⲛⲉϥϩⲙϩⲁⲗ ⲛⲙⲙⲁϥ ⲁⲩⲡⲟⲗⲉⲙⲉⲓ ⲙⲛ ⲛⲁⲗⲗⲟⲫⲩⲗⲟⲥ ⲁⲩⲱ ⲇ︤ⲁ︦ⲇ︥ ⲁϥϣⲧⲟⲣⲧⲣ 16ⲓⲉⲥⲃⲓⲛ ⲇⲉ ⲡⲉⲧϩⲛⲛⲉϣⲏⲣⲉ ⲛϩⲣⲁⲫⲁⲛ ⲉⲃⲟⲗ ϩⲛ ⲛⲉϣⲏⲣⲉ ⲛⲛⲉⲅⲓⲅⲁⲥ ⲡⲁⲓ ⲉⲣⲉⲡϣⲓ ⲛⲧⲉϥⲗⲟⲅⲭⲏ ⲛⲁⲣϣⲟⲙⲛⲧ ⲛϣⲉ ⲛⲥⲁⲧⲉⲉⲣⲉ ⲛϩⲣⲏϣⲉ ⲛϩⲟⲙⲛⲧ ⲁⲩⲱ ⲛⲧⲟϥ ⲛⲉϥϩⲏⲕ ϩⲛ ⲟⲩϩⲱⲕ ⲛϣⲛⲃⲉ ⲉⲛⲉϥϯ ⲛϩⲧⲏϥ ⲉⲣⲱϩⲧ ⲛⲇⲁⲩⲉⲓⲇ 17ⲁⲩⲱ ⲁⲃⲓⲥⲁ ⲡϣⲏⲣⲉ ⲛⲥⲁⲣⲟⲩⲉⲓⲁ ⲁϥⲃⲟⲏⲑⲉⲓ ⲉⲣⲟϥ ⲁϥⲡⲁⲧⲁⲥⲥⲉ ⲙⲡⲁⲗⲗⲟⲫⲩⲗⲟⲥ ⲁϥⲙⲟⲟⲩⲧϥ ⲧⲟⲧⲉ ⲁⲩⲱⲣⲕ ⲛⲇ︤ⲁ︦ⲇ︥ ⲛϭⲓ ⲛⲣⲱⲙⲉ ⲉⲩϫⲱ ⲙⲙⲟⲥ ⲛⲁϥ ϫⲉ ⲛⲛⲉⲕⲉⲓ ⲛϫⲓⲛ ⲉⲡⲉⲓⲛⲁⲩ ⲉⲃⲟⲗ ⲉⲡⲡⲟⲗⲉⲙⲟⲥ ⲛⲙⲙⲁⲛ ϫⲉ ⲛⲛⲉⲕϫⲛⲉⲡϩⲏⲃⲥ ⲙⲡⲓ︤ⲏ︦ⲗ︥ 18ⲁⲥϣⲱⲡⲉ ⲇⲉ ⲙⲛⲛⲥⲁ ⲛⲁⲓ ⲁⲩⲡⲟⲗⲉⲙⲟⲥ ⲟⲛ ϣⲱⲡⲉ ϩⲛ ⲅⲉⲑ ⲙⲛ ⲛⲁⲗⲗⲟⲫⲩⲗⲟⲥ ⲧⲟⲧⲉ ⲁϥⲡⲁⲧⲁⲥⲥⲉ ⲛϭⲓ ⲥⲉⲃⲟⲭⲁ ⲡⲁⲥⲧⲁⲑⲱⲧⲓ ⲛⲥⲉⲫ ⲡⲉⲧϩⲛⲛⲉϫⲡⲟ ⲛϩⲣⲁⲫⲁ 19ⲁⲩⲡⲟⲗⲉⲙⲟⲥ ⲟⲛ ϣⲱⲡⲉ ϩⲛ ⲣⲟⲟⲃ ⲙⲛ ⲛⲁⲗⲗⲟⲫⲩⲗⲟⲥ ⲁⲩⲱ ⲉⲗⲉⲁⲛⲁⲛ ⲡϣⲏⲣⲉ ⲛⲁⲣⲓⲱⲣⲅⲓⲙ ⲡⲃⲁⲓⲑⲗⲉⲉⲙⲓⲧⲏⲥ ⲁϥⲡⲁⲧⲁⲥⲥⲉ ⲛⲅⲟⲗⲓⲁⲑ ⲡⲅⲉⲑⲑⲁⲓⲟⲥ ⲡϣⲓ ⲇⲉ ⲙⲡⲉϥⲙⲉⲣⲉϩ ⲛⲉϥⲟ ⲛⲑⲉ ⲙⲡϩⲟ ⲛⲛⲉϣⲁⲩⲥⲱϩⲉ 20ⲁⲩⲡⲟⲗⲉⲙⲟⲥ ⲟⲛ ϣⲱⲡⲉ ϩⲛ ⲅⲉⲑ ⲛⲉⲣⲉⲟⲩⲣⲱⲙⲉ ⲇⲉ ⲙⲙⲁⲩ ⲉⲡⲉϥⲣⲁⲛ ⲡⲉ ⲁⲇⲱⲛⲓ ⲁⲩⲱ ⲛⲧⲏⲏⲃⲉ ⲛⲛⲉϥϭⲓϫ ⲙⲛ ⲛⲁⲛⲉϥⲟⲩⲉⲣⲏⲧⲉ ⲛⲉⲩⲛⲁⲣⲥⲟⲟⲩ ϩⲓ ⲥⲟⲟⲩ ⲉⲧⲣϫⲟⲩⲧⲁϥⲧⲉ ⲛⲏⲡⲉ ⲛⲧⲟϥ ϩⲱⲱϥ ⲉⲁⲩϫⲡⲟϥ ⲛϩⲣⲁⲫⲁ 21ⲁⲩⲱ ⲁϥⲛⲟϭⲛⲉϭ ⲙⲡⲓ︤ⲏ︦ⲗ︥ ⲡⲁⲓ ⲇⲉ ⲁϥⲡⲁⲧⲁⲥⲥⲉ ⲙⲙⲟϥ ⲛϭⲓ ⲓⲱⲛⲁⲑⲁⲛ ⲡϣⲏⲣⲉ ⲛⲥⲉⲙⲉⲉⲓ ⲡⲥⲟⲛ ⲛⲇ︤ⲁ︦ⲇ︥ 22ⲡⲉⲓϥⲧⲟⲟⲩ ⲁⲩϫⲡⲟⲟⲩ ⲉϩⲉⲛⲉⲃⲟⲗ ⲛⲉ ϩⲛ ⲛϣⲏⲣⲉ ⲛⲛⲉⲅⲓⲅⲁⲥ ϩⲛ ⲅⲉⲑ ⲙⲡⲏⲓ ⲛϩⲣⲁⲫⲁ ⲁⲩϩⲉ ⲇⲉ ϩⲁⲧⲟⲟⲧϥ ⲛⲇ︤ⲁ︦ⲇ︥ ⲁⲩⲱ ϩⲁⲧⲟⲟⲧⲟⲩ ⲛⲛⲉϥϩⲙϩⲁⲗ
Copyright information for
CopSahBible2